Wudang – Sai Hkawq Let Hkungga Nawng Shara
Wudang hta sai hkawq let hkaungga jaw ai lam gaw Yesu Hkristu a prat shawng kaw na Jinghpaw Wunpawng sha ni lang hpang sai..,
Wudang ngu ai ga gaw natjaw hte
seng ai natjaw prat nag a rai nga ai. Jinghpaw Wunpawng myu masha ni Hkristan
tai wa ai aten hta ndai Wudang ngu ai ga gaw lachyum grai rawng ai, lachyum
grai sung a ga tai wa sai. Jinghpaw ga hta Ngadang kaw na wudang tai wa ai lam
mu chye lu ai.
Anhte Jinghpaw ni “Nga” ngu ai
hpe shaga ai shaloi “wu” ngu lang chye ai. Ngala, ngayi, ngahpraw ngu tsun na
malai Wula, wuyi, wuhpraw ngu tsun ga ai. Dai majaw “Wudang” ngu tsun ai shaloi
Ngadang – Nga hpe shadang ai ngu tsun mayu ai. Nga madu ni “Nga” hpe sat sha
mayu ai shaloi Nga ni lai ai shara kaw nhpan kum da ai. Dai nhpan kaw sat sha
na Nga ni hpe gawt bang ai. Dai shara kaw dun la yak ai Nga ni hpe sat ma ai.
Nga wula kaba ni lak wa ai shaloi nhpan ni daw mat waw mat chye ai. Dai majaw
shi hpe gyit na shara kaw shadaw kaba lahkawng jun ra ai. Dai shadaw kaba
lahkawng a lapran kaw Nga gyit na the Nga dun na shadaw naw jun ra ai. Dai
shadaw lahkawng a mying hpe mung Nga hpe shadang ai re majaw Ngadang ngu tsun
ai. Dai Ngadang kaw na Wudang byin wa ai.
Nat jawjau ai ni hkungga nawng
dumsa sa ai shaloi Nga hte rau wudang shadaw mung hkungga hta lawm ai hku dumsa
ma ai. Nga wuni (N zai ai, ni ai) Nga rai yang shi hpe natjaw ai shaloi nta a
ndaw kaw wudang shadaw hpe jun nna dai Nga wu-ni hpe dun nhtawm dai kaw sai
jahkawq ai. Nat jaw makam hta sai gaw hkrung ai yawng a asak ntsin re ngu kam
ai. Sai hkring hte masha asak hkrung na lam mung hkring mat ai. Shingrai nta
madu wa (sh)nta masha langai ngai machyi nna hpa n luq n sha kam yang sai hkyet
mat ai; sai hkyet mat jang si wa ai. Dai majaw machyi ai nta madu wa a sai hpe
malai bang ya ai hku, Nga gaw sai hkawq ra ai. Sai hkawq maq ai hte Nga si mat
ai. Machyi ai masha a malai hkamja Wa na matu sai hkawq nna si hkam ya ai lam
rai nga ai. Ndai hkungga hpe Wudang hta dun nna sat ai. Dai majaw Wudang hte
Hkugga Nga gaw maren sha re.
Yesu hpe jen sat ai shadaw hpe Dr. Ola Hanson gaw Wudang ngu bai lang da ai. Yesu hkawq kau ya ai sai gaw Shinggyim masha ni yubak a majaw asak sai hkyet mat nna si mat wa ai hpe asak bai matut na matu Hkrung ai asak asai malai bai tai ya ai. Yesu a asai the asak hkrung nga lu ai. Wudang hta Yesu hkawq kau ya ai asai hte kashin yang hkyen zawn hpraw wa ai. San seng chyoi pra wa ai. Hkrung a asak rawng wa ai, Htani htanaq asak lu ai. Dai hpe Yesu kaw na hkrung ai nsoi nsaq n lu ai wa, Wenyi n rawng ai wa n chye na ai. Hpa majaw nga yang sai the kashin yang hkyen zawn hpraw ai lam n nga ai. Grau pyi num shaq ai. Dai majaw moi na anhte a jiwa ni gaw sai the asak gara hku seng ai hpe asan sha chye na ai. Dai ni na Tsidu (sarawun) ni chye na ai zawn sai ahkyak ai lam shanhte atsawn chye na ma ai.
Moi Yesu Hkristu Yubak lu ai
anhte Shinggyim masha ni a matu si hkam ai Wudang gaw Ngadang n re ai sha Yubak
ari kaba lu ai ni hpe jen sat ai hpunpyen shadaw re. Dai Hpun pyen shadaw gaw
sai hkyet mat nna si wa hkyen ai wa a asak matut na matu sai hkawq hkungga Nga
sat ai shara mung n rai nga ai.
Jinghpaw Wunpawng sha ni hta
masha hpe jen sat ai shadaw nnga ai. Asai hkawq ya ai Wudang sha nga ai.
Lachyum namnak grai rawng ai. Chyum mungga masa hte hkrak re ai jawjau lai
Jinhpaw ni kaw nga taw ai. Dai majaw Sara kaba Ola Hanson gaw Yesu hpe jen sat
ai Hpun pyen shadaw ngu ntsun ai sha Wudanng nu jai lang ai. Dai majaw Yesu
Hkristu Shinggyim masha ni a matu hkungga tai let sai hkawq si hkam na lam hpe
Jinhgpaw Wunpawng sha ni mahkam masham hta tau hkrau nna nga hpang sai. Karai
Kasang a laksan mau hpa lagaw hkang ni (God’s Footprints) rai nga sa law.
Kaning rai nme law, yubak a shabrai
gaw si mat ai rai nga ai; Karai Kasang a chyeju kumhpa chyawm gaw, anhte a Madu
Hkristu Yesu hta e, htani htana asak rai nga ai (Roma 6:23).
Wudang hta Yesu hkawq kau ya ai
sai aq majaw Htani Htanaq asak anhte lu la sai. Dai wudang hpe sadi let hpai yang
asak janmau Anhte lu. Amen! Amen! Amen!
Reference – Sara Pungga Ja Li –
Jinghpaw a Hkap La Hkansa Shatup Lam
Credit – Rev. Palawng Naw Tawng, (Facebook)