MALAWM NI

SHAGAWNG BUM GA

SHINGRA MABYIN LAM

A

KATA NA

“RUYAK TSIN-YAM”

HTE

“AKYU CHYEJU”

By:

Rev. Nang Gaw La

CHYEJU DUM GA

SHAGAWNG BUM GA SHINGRA MABYIN LAM A KATA NA “RUYAK TSIN YAM” HTE “AKYU CHYEJU” laika buk kaji byin wa hkra lam madun ai Karai Wa hpe chyeju dum ai.  N’gun jaw Hpaji jaw karum shakut lawm ya ai myit su jinghku ni yawng hpe chyeju dum ai. Grau nna lawu de mying ka ai myit su kanu kawa ni hpe nachying chyeju dum ai law.

1.      Rev. Nmai Gam         -           Nambu Edin, Putao

2.      Rev. Ndawng Gum An          Lung Hkang, Hpakant

3.      Du Wa Manggu Hta Tang    Putao Kawng

4.      Salang Maju Tu                     Ding Hkyet, Putao

5.      Sarama Ndau Kai Bu           Putao Kawng

6.      Ding Hkyet Buga Jubili Labau

Type kayat, computer hte soi ka rai nna laika buk byin tai hkra karum shakut nga ai Sara Nang Gaw Mung Ring (KTC, Nawng Nang) hpe mung, Internet online hta mara ya ai Nung Lungmi Htunghking Komiti ni hpe mung na chying chyeju dum nngai.

Rev. Nang Gaw  La

Putao

JINGHPAW BUGA HTA NGA AI MARE KABA NI A PANGLAI PE TSAW

1. Myitkyina mare                  -           463

2. Chahpwi mare                   -           894

3. Sumpra Bum                     -           4600

4. Putao mare                        -           1379

5. Nogmung mare                 -           1789

6. Machyang Baw                 -           1324

7. Hkawng Lang Hpu            -           1700

DAW KABA 1 - CONTOUR LINE HTA HKAN NNA TU AI HPUN, KAWA, NAMPAN NI HTE DUSAT AMYU NI

1:1      Panglai Pe tsaw 8000 a lahta e tu ai hpun amyu ni:

-         Lachu Hpun

-         Hkang ga Hpun

-         Htang La Hpun

-         Dasu (Daso) Hpun

-         Marau Hpun

Ndai hpun amyu ni gaw hpun kaba ni rai nna tsaw dik ai bum ni hta tu ra ai.  HKyen katsi dik hpe hkam lu ai hpu amyu ni rai ma ai.  Kaga hpun kaji kadun amyu ni hte ja dik ai hpun amyu ni law law mung tu ma ai.

DAW KABA 2 - MALING HPUN NI HTE DU SAT AMYU NI

2:1      Hpun Amyu Ni

2:1.1   Asung shang Manu Dan ai Hpun Kri Amyu Ni;

Dum nta ni galaw gap ai shaloi ahkyak madung ngau hku lang ai akri rawng ai hte manu dan dik ai maling hpun nu ni gaw; magram hpun, Nchyit hpun, Larawn Hpun, Lapan hpun, Yang Noi hpun, U Shagri Hpun, Larang-Rang U, Rang Chyap, Labyi Hkyeng,, Labyi hpraw, shadwi hpun hte Maihting hpun ni re ai.  Ndai hpun nu ni gaw dum nta htingnu ni galaw gap ai shaloi grai asung shang ai hpunkri ngau madung ni hku nna lang nga ma ai.

DAW KABA 3 - SHAGAWNG BUM GA HTA BYIN LAI WA SAI HKU WA NI A LAM

(JI WA NI A MAU MWI MATSING)

Moi shawng de shagawng Bum ga hta shingra mabyin lam a tsinyam hku wa amyu myu hkrum sha lai wa sai, Ji wa ni a maumwi lik nga ai.  Jinghpaw shagawng bum ga hta byin lai wa sai hku wa tsin yam amyu ni a mying lawu na hte maren hku wa amyu ni rai nga ai. 

3:1      Ji Woi Ni A Ga Matsing

3:1. 1  Shing Rawng Hku Wa (Zar Rung Dakø)

Jinghpaw shagawng bum ga hta moi shawng de Shing Rawng Hku wa byin lai wa ai.  Hkrum sha lai wa sai.  Raitim galoi aten, gara shaning hta byin lai wa sai lam n chye lu ai.  Shing Rawng Hku wa ngu ai gaw marang n htu ai, aten na na jan kri nna, bum maling kata na hpun kawa naw nam ni yawng hte hkai nmai hpun ni hte namsi nam saw hpun ni yawng hkraw si mat ai hte sha hpa n lu ai.  Jan kri ai lam a majaw hpa hkai tim kaman hkraw sum mat ai. 

DAW KABA 4 - KAWA SUM HTE SENG AI LAM

Jinghpaw shagawng bum ga hta kawa amyu law law hpan nga ai. Kawa amyu hpan langi hte langai shi aten du, nhtoi gu wa ai shaloi sum sum n na kawa amyu ban prat ningnan bai bra wa ma ai. Kawa amyu hpan hta hkan nna sum hpe mying shamying ma ai. Gashadawn – Ding mang ga, Hkahku Jinghpaw ga, Hkahku ga rai nga ai. Sum sum ai nga ai ga gaw  shagawng bum ga hta tu ai kawa amyu hpan ni lap run mat nna apu pu ai hte kawa hpun ni hta asi si wa ai lam hpe “SUM SUM” ai nga ma ai. Sum sum ai lam gaw grai n kaja ai, akyu yawm ai re ai, Shagawng Bum ga nam maling kata na pri nem tsawm ai, manu dan ai kawa amyu ni yawng bum ting  mung ting na kawa ni yawng hkrawt mat ai sum mat ai lam rai nga ai. Kawa sum sum ai lam a majaw matut hkrum hkra shangun ai lam gaw  shaggyim masha ni, hkai nmai ni a ntsa e lang lata hkra wa nna, sum sum ai lam a majaw shinggyim masha ni a nga mu nga mai jat galu kaba wa lam hpe kayat daw kau ya nna, sawn n dang lu ai machyi lam sum lam hte shingdim maga de nhtang ka nawng kau da ai lam hkrum shangun nna ru yak jam jau lam kaba hte katut shangun ai sum sum ai lam re ai.

DAW KABA 5 - “SUM” NGU AI LACHYUM HTE HKRUNG KANU NI

Sum sum ai ngu tsun lang ai ga gaw Hka Hku Jinghpaw ga, Ding Mang ga rai nga ai.  Shagawng bumga nam maling kata na kawa amyu ni yawng shi a aten ladaw nhtoi gu wa ai shaloi Kawa hpun, kawa ning hpang yawng shai wa ai, alap a malai apu pu wa ai, asi noi sumbraw wa ai hte asi myin wa ai, asi run hkrat wa ai, shagawng bumga na kawa maling ni bum ting, mung ting na kawa ni ladaw galai ai, kawa maling ni yawng hkraw zam mat ai, kawa amyu ni yawng Sum ai majaw, sum mat ai lam hpe Sum sum ai nga tsun ma ai.  Sum sum ai lam gaw sum mat ai, kaba dik ai, sum mat ai lam re ai.

DAW KABA 6 - YULI "HKU WA" A LAM

Yuli hku wa ngu gaw shinggyim masha ni sha na matu galaw lajang da ai, hkai jahting tawn shachyip tawn da ai sha hpa ni, yi yan wa ni hta hkai jahting da ai hkai nmai nsi naisi ni yawng hpe yuli yu manam hpung ni e jahten shaza, sha shama kau ya ai sha hpa nai mam nsi ni n lu mat sai majaw hkrum ai tsin-yam rai nga ai. Yuli yu hpyen a majaw hkrum ai hku wa tsin-yam rai nga majaw yuli hku wa ngu ai rai nga ai.

DAW KABA 7 - HKU WA HTE HKU SHAT

Hkuwa ngu ai gaw hkrat sum ai lam kaba hte hkam sha na matu yak dik ruyak tsin-yam rai nga ai. Hku wa ngu ai gaw sutgan lu malu yawng hpe ginlut kau ya ai hkrat sum lam kaji kaba yawng mayawng a npawt nhpang mung rai nga ai. Hku wa hkrum ai majaw kawsi hpang gara hkrum sha sai. Lu sha kaja n lu sha sai, hkum hkrang hta lasi lamun, sai n-gun n hpring sai, hkam ja lam hta hkra wa sai, bawnu hta mung hkra wa sai. Hku wa ngu ai gaw shinggyim masha ni sha na matu galaw jahting da ai yitung yiwa na hkai nmai ni hpe yuli yu ni e sha shama kau ya ai majaw hkrum sha ai kawsi hpang gara hkrum ai lam rai nga ai. Masha ni sha na lu sha yawng hpe yu li yu ni sha shama kau ya ai majaw shinggyim masha ni gaw nam maling kata de shang ashep nna, sha hpa tam sha ra wa sai. Hpa n seng ai nam maling kata de shang maling kata de shang ashep nna tam sha la ai nam kata na sha hpa hpe hku shat ngu nga ai.

DAW KABA 8 - CHYUM LAIKA HTA MADUN AI HKU WA NI

Hku wa hte seng nna chyum laika hta law law lang madun da nga ai.  Hku wa amyu hpan 2 ginhka da nga ai lam mu lu ai.  Hku wa ngu ai amyu hpan ni yawng gaw hkrat sum shangun ai ruyak tsin yam lam hkrai rai nga ai.  Hku wa  gaw n kaja ai.   Hkrit hpa tsang hpa tsin yam hkrai rai nga ai.

8:1      Hku Wa (Famine) Hpan Amyu 2

8:1.1   Hkum hkrang hte seng ai lu sha, lu hka ntsin taw wa ai hku wa

“Dai mung e hku hku wa ai rai nna Abram gaw Egutu mung de sa shingbyi nga na pru sa wa ai.   Kaning rai nme law dai mung e hku wa kaba hku nga ai (N.N 12:10)”.

DAW KABA 9 - RUYAK TSIN-YAM KATA NA AKYU CHYEJU

N sin gumdin hpum nga ai shara hta nhtoi hkum pru wa ai.

Machyi jung nga ai shara hta maitsai sanpra ai lam pru wa ai.

Myit hkawn chye na ai lam n nga ai shara hta chye chyang kunghpan ai lam pru wa ai.

N ju ndawng ai lam nga ai shara hta tsawra ai lam, rap ra ai lam pru wa ai.

Gasat gala ai shara hta ngwi pyaw simsa ai lam pru wa ai.

Hkrap ai shara hta kabu mani kabu gumlawt ai lam pru wa ai.

Gang je kau ai shara hta bai chywi kapa ai lam byin  pru wa ai.

Paw kabai kau ai shara hta bai hkai, hta mahkawng da ai lam byin pru wa ai.

“Anhte hpe sharin na matu Karai Kasang a chyeju gaw dan pru wa sai.  Masha yawng hpe hkye hkrang la ai lam hpaw wa sai (Titu 2:13).”