Hku wa hte seng nna chyum laika hta law law lang madun da nga ai. Hku wa amyu hpan 2 ginhka da nga ai lam mu lu ai. Hku wa ngu ai amyu hpan ni yawng gaw hkrat sum shangun ai ruyak tsin yam lam hkrai rai nga ai. Hku wa gaw n kaja ai. Hkrit hpa tsang hpa tsin yam hkrai rai nga ai.
8:1
8:1.1 Hkum hkrang hte seng ai lu sha, lu hka ntsin taw wa ai hku wa
“Dai mung e hku hku wa ai rai nna Abram gaw Egutu mung de sa shingbyi nga na pru sa wa ai. Kaning rai nme law dai mung e hku wa kaba hku nga ai (N.N 12:10)”.
“Abraham a prat e wa ai hku w ahta kaga dai mung e hku wa bai hku nga ai. Dai rai nna Isak gaw Hpilisti mung na hkawhkam Abimelik nga ai Gerara de sa wa ai (N.N 26:1).”
Samari mare hta hku wa kaba hku wa nna, na na wa wang tawn ai majaw lawze baw langai mi gaw gumhpraw lap matsat shi; hkrudu hpyi jare mi gaw lap manga shi; hte dut lu nga ai (Kasa 11:27-30; I Kor. 16:1).
Karai Kasang a mungga wenyi lu sha taw matsan wa ai hku wa – Lack of God’s Word: “Ndai mungdan hta ngai hku wa shangun ai aten du na re ai; kawsi hpang gara ai hku wa n rai; Yehowa a mungga hpe nna lu ai hku wa rai na ra ai. Mung masha ni gaw Yehowa a munga hpe tam let nawng mi kaw nna nawng mi du hkra ding dung kaw nna dingda gat nwan hkawm timung nmu lu na ma ai (Amo 8:11-12).
Masha gaw Karai Kasang a n gup hta na pru ai mungga nlang hte hte hkrung nga lu na ra ai nga nna ka da nga ai nga ai (Mt. 4:4).
“Yesu gaw asak muk gaw ngai rai nga nngai; ngai hpang de sa ai wa gaw kawsi hkrum na n rai” (Yawhan 6:35).
8:1.2 Karai Kasang A Ga N Madat Ai Majaw Hkrum Na Jamjau Lam
Amyu masha ni Karai Kasang a ga n madat ai Karai Kasang hpang de n wa ai, Karai Kasang hpang de wa na malai Karai Kasang hpe chyam yu yu di ai majaw Karai Kasang pawt nga ai.
“Amyu masha ni Karai Kasang hpe chyam yu yu di nna, Israela a chyoipra ai wa hpe shapawt mu ai. Shanhte a nsi naisi ni hpe ding gam yaw ni e jaw kau mu ai. Shanhte a sabyi ru hpe sin hte sakumu hpun ni hpe hkyen hte jahten kau ya mu ai. Shanhte a yam nga ni hpe sin hte yam nga hpung ni hpe myihprap hte sat kau ya mu ai” (Sh.K. 78:41-48).
“Masha kasha e, mungdan gaw ngai hpe yubak galaw nna, tara hpe grai tawt lai ai majaw, ngai gaw de a ntsa e, lata ladawn muk ngu ai dawhkrawng hpe agrawp kau ai hte hkuwa shangun nna dai mung na masha hte yam nga ni hpe shamyit kau na” (Ezekela 14:13).
“Dawi a prat e masum ning tup hku hku ai rai nna Dawi gaw Yehowa kaw san yu yang, Yehowa tsun ai gaw Gibeon masha ni hpe sat ai, Shawlu hte masha asai hkaw kau ai, shi a amyu a majaw rai nga ai” (2 Samuela 21:1).
“Kaning rai nme law Yehowa gaw hku wa shangun dat nna dai mung ting hta sanit ningtup hku wa wa na ra ai, ngu nna shadum da mu ai” (2 Hk.hk 8:1).
“Shaloi dai mung hta e gawn hku wa shabyin dat nna lu sha a npawt yawng hpe jahten kau mu ai” (Sh.k 105:16).
“Nanhte hpe jahten na matu hku wa ngu ai n hkru ai Pala ni hpe ngai dat dat yang nanhte hta kawsi hpang gara jat wa nna, myk ngu ai daw hkrawng hpe ngai daw kau na nngai” (Ezekela 5:16).
Ning gawn hku wa, ana zinli hte hpyen majan gasat gala rai nga ai ndai ni gaw shinggyim pinra hta ruyak tsinyam rai nga ai lam chyum laika hta madun ai. Shinggyim masha ni Karai Kasang hpe malap, Karai Kasang a ga n madat, hkan shatup ai lam n nga ai, n hkru n tara ai lam hta hkan nang ai lam law wa ai shaloi n dum shamyi rai hkrung nga nga ninglen si mat ai hte bung na, pyawlen nan wa ai shaloi shinggyim masha ni a ntsa e du chye ai tsin yam ni re ai lam madun nga ai. Karai Kasang gaw shinggyim masha ni hpe shi a amyu masha ni tai let mayat maya lawhtam galu kaba ai hte sutsu ngamu nga mai kunghpan wa ai kashu kasha ni tai na sharawng awng nga ai. Karai Kasang a ga n madat malap kau, Karai Kasang hpe chyam dinglik yu yu re ai ni hta Karai Kasang a pawt sindawng ai lam du wa na lam tsun nga ai.
8:2 Tak Sawn Yu Na Lam
Hku wa gaw Karai Kasang kaw na du wa ai lam chyum laika hta madun da nga ai Dai gaw shinggyim masha ni a kyang hten za wa ai shaloi, shut hpyit ai lam law htam wa ai shaloi, yubak mara galaw nna Karai Kasang n hkam sharang lu ai pawt wa ai shaloi byin pru wa chye ai ruyak tsin yam re ai lam mu lu ai.
Shaloi Jinghpaw shagawng bum ga anhte a buga anhte a ginra anhte a shara hta shaning 50 ning ngu ai lamyi laman gu ai nhtoi du wa ai ladaw shagu hta man man kayin kawai nna magam darat n ginhka kadai hpe mung n yen ai shagawng bumga na amyu masha ni yawng hpe ruyak tsin yam hkrum shangun wa wa rai nga ai yuli hku wa hpe gaw kaning ngu sawn la na rai ta? Ndai yuli hku wa gaw Jinghpaw bumga hta kayin kawai kawm nga ai hku wa gawngwang rai nga ai. Anhte a buga hta kayin kawai nna du pru wa wa sha a rai nga ai tsin yam hku wa rai nga ai majaw anhte a matu nan rai nga ai.
Dai hku wa a lam gara hku tak la na, gara hku sawn la na, gara hku mahtai tam la na, jaw dik ai mahtai tam la na hte htang da, maja nga chye ai ni rai nga na gaw shagawng bum ga na kashu kasha ni a lit, kaba dik ai lit rai nga ai law. Yuli hku wa anhte a buga hta kayin kawa nna du pru wa wa sha arai nga ai. Moi ji wa ni a lakhtak ladaw hta mung law law lang du pru lai wa sai.. Ahte a aten hta mung hkrum sha lai wa saga ai. Hpawt shingdim e mung bai kayin du wa na re ai. Shaloi Jinghpaw shagawng bumga de du kayin pru wa wa re ai yuli hku wa hpe Karai Kasang kaw na re, Karai Kasang shangun dat dat rai ya nna shagawng bumga na amyu masha ni hpe adup apyen na tsin yam a matu du wa ai yuli hku wa re ai ngu ai mu jut hku nna hkam la na i? Gara hku hkam la na? Tinang hkam la ai lam gaw tinang a myit kraw kaw na re ai majaw tinang a matu nan rai nga ai n rai ni? Jinghpaw bumga hta kayin kawai hkawm nga ai yuli hku wa rai nga ai majaw Shagawng Bumga na kashu kasha ni yawng e mahtai tam la ra ga ai, lit kaba mung rai nga ai. Jaw ai mahtai tam la chye na matu mung ahkyak rai nga
Ngai gaw Jinghpaw Shagawng Bumga de du kayin pru wa rai nga ai yuli hku wa a lam hte seng nna Karai Kasang kaw na re ai lam hkam la ai. Raitim dagam dala hku, ding nye hku nna du kayin pru wa wa re ai gaw n re ai. Shaning ladaw du hkra ladaw ni hta numroi hkra ji ni shinggyim masha ni hpang de du wa ai hte maren ladaw galu shaning galu 50,100 ning ngu lamyi hpring wa shagu yuli hku wa du kayin wa ai lam gaw labau lamyi a kata kaw e num roi hkra ji du pru wa ai hte maren Shagawng Bumga a matu san san du wa ai ladaw yuli a ladaw re ai.
8:3 Num Roi Hkra Ji Ni
Num Roi Hkra Ji ni a lam Jinghpaw Shagawng Bumga na masha ni atsawm sha chye nga ga ai. Num Roi Hkra Ji amyu langai hte langai a nsen ni hpe mung atsawm chye ginhka nga ga ai. Num Roi hkra ji ni gaw “shinggyim masha ni akyu hkam la mu ga” – aten ladaw lang ya ai. Shinggyim masha ni hpe shadum ai, myit jasu sharawt ya ai n sen ni rai ng aia. Num Roi Hkra Ji ni a nsen hpe na matsing da let shinggyim masha ni gaw ladat shaw yi ngam jahkrat rai nga ai. Num Roi hkra ji ni a nsen ni gaw shinggyim masha ni hpe kaja sha akyu jaw ai nsen ni rai nga ai law. Myit jasu myit dum hprang shangun nga ai. Dai Num Roi hkra ji ni gaw;-
Magam bungli yi ngam a masing jahkrat na aten, yi ngam de shang hpang na aten rai sai, tsun shadum ai N-hpyeng bai u.
Yi ni nat mu, yi tung yiwang yi ngam ni hpe sawm jasan hkyen lajang na aten du wa sai, lawan yi nat la mu nga tsun shadum ai- Shanan Gan u.
Yi tung yi ra ga kata de n si nai si ni- Nai nam hkai nu n-gawng ni hpe hkai da mu, ga de lawan wan lup da mu. Mam ni lawan ting mu aten du wa sai nga tsun shadum ai, Hkang Gawng Hkang Gawt U.
Nsi naisi ni hkum hkum tu wa sai. Nsi naisi ni hpe shingnip magap da ai tsing ni mung grai lawn wa sai, grai tu wa sai, grai htat wa sai, lawan wan tsing hkyen shaja mu, aten du wa sai nga tsun shadum ai ; Puk dun U.
Hkai da sai yi yan wa na hkai n mai, nsi naisi ni yawng apu pu tsawm wa magang sai. Mangai ngai wa sai kabu mu tsun shana ai grai pyaw ai n sen; Gaw Yeng.
Yi tung yiwang na hkai n mai ni nam ni myin wa sai, shu la mu la lahkawn mahkawng la na aten du wa sai lawan su mu rawt mu tsun shadum ai- Maran U.
Chyum laika hta mung lamik kumla a lam Yesu tsun da nga ai. Mahte 16:1-4 “Byin pru nga ai lamik kumla a lam, lachyum hpe n chye na ai nga shalai kau ai lam, byin pru nga ai lamik kumla a lam hpe hpa zawn n nawn kau ai lam Yesu Karai Kasang n ra nga ai, sha n ga, mara shagun nga ai. Daru pawt nga ai. Tinang a aten tinang a makau grup yin hta byin pru nga ai kumla ni hpe yu chye ai, mu chye ai hte mahtai tam mahtai shapraw la chye nga na she ra nga ai. Jaw ai mahtai tam la chye jang she akyu pru wa na lam Karai Kasang tsun da nga ai. Anhte a shagawng bumga shingra mabyin lam hta lawm ai kumla a mahtai hpe tam la chye na ahkyak nga ga ai.