Ndai mung hpe Kaang Shingra mung, Lapran Hpatwat mung ngu nna tsun lu ai. Hpa majaw nga yang ndai mung gaw Likhpan mung hte mungkan ga a lapran hpatwat kaw nga ai majaw re. Ndai mung hta Madai nat ni hte nat salang kaba ni up sin ai mare kaba 10 nga ai. Dai sha n-ga, Madai Ninghke ngu ai shara mung nga ai. N Shaga Wa hte N Shaga Jan yan a Lu Len Sha Len mare mung nga ai, Sali Yang Bangsau mung nga ai. Jahku Numshe mung nga ai Masang Lahkum mung nga ai.
Madai Mare
Ndai mare hpe Madai nat salng kaba wa e nan up sin ai. Shi hpe Ja E Myin , Ntsaw Nu Madai, Myin Madai ngu nna shamying ai. Shi a mying shingteng majing hpe gaw dumsa kaba ni sha chye ai. Masha kaga hpe mung n chye shangun ma ai. Masha hpe tsun hkrup jang tsun dan ai dumsa wa teng sha si ai, nga nna kam sham hkrit kamyin chye ma ai. Dums awa asak aprat htum wa mahkra e sha lahkum htawt hkam ai wa hpe tsun dan wu ai. Mdai nat dumsa ni shaloi Madai nat a shingteng mying tsun ra yang mung, shana yup tung ten e yup ai ni gaw yup ai shaloi, nta nhku e ka ai ni gaw ka manawt nna maru marang re ai shaloi, dingsi, shupsheng, chying, bau ni dum shangoi ai shaloi sha dumsa wa e tsu shapraw chye ma ai. Madai wa a madu jan gaw Hkai Madai re ai. Ndai Madai wa gaw lahta de Ningsin Dumlawng du hkra, lawu de Hpawgam mare na Madumnam daru du hkra up hkang ai. Madai mare hta Madai bu ni sha nga ai Ndai mare a numshang kaw Madai Ninghke ngu ai shara langai mi nga ai. Dai gaw Likhpan mung lam na gyip htum ai shara re ai. Dai kaw nga kaba ni n lai lu ai. Dai majaw ngadaw nga, ngaram nga, ngarung nganen ngahpaw nga zawn re ai asak laning mi hte lawu grit re ai nga kasha ni sha lai di lu ai. Rung galu, rung hkap, rung wap, rung hawn nga kaba ni n lai lu ma ai majaw, Ngahpang Yang ngu ai Ngadan Yang Kaw e nga kaba ni yawng pra nga nga ma ai. Madai Ninghke a majaw Madai Nat hpe nga sak nawng yang laning mi hte lawu grit re ai nga kasha ni hpe sha jaw jau ai htung nga nga ai rai.
Lu Len Sha Len Maren
Ndia mare hpe N Shaga Wa hte N Shaga Jan e de ai. N Shaga Wa N Shaga Jan ngu ai Ginseng Mahkawn hte dinghku de ai. Shan gaw Madai mare hte Kadaw Yang mare lapran, Madai Ninghkye garai n du ai kaw, Likhpan mung lam a pai maga e nga ai Lu Len Sha Len mare hpe de nna nga ma ai. Shan gaw dinghku de ai raitimung ga n shaga ai sha lata hte chyu dingsi hkat nna nga ai. Gat seng ni hpaw dut ai. Hpai, shawk ka, shamyen, giri banja zawn re ai mungkan ga na ginsup hpa, lawng hpa amyu myu hpe hpaw tawn ai majaw, shan a mare kaw masha law law hkum ai. Lu let sha let chyaru nang let ningsin ninghtoi mung n dum n chye ai sha pyaw daw kadaw ai shara re ai. Shan a mare de hkrang ai lam nmaw kaba nga ai majaw, Likhpan mung de lung ai ni lam dam loi ai shara re. Dai mare de lam dam hkrup ai ni gaw bai nhtang wa na matu yak la mat wa sai. Dai majaw shan a mare hpe Lu Len Sha Len Mare ngu grai htap htuk ai hku shamying ai rai nga ai Shan gaw kashu lasha law law shangai shaprat ma ai.
Kadaw Yang Mare
Ndai mare hpe Kadaw Yang Madai wa e up sin wu ai. Ndai wa gaw lahta na Madai Kaba wa a hkinmang wa re ai. Lahta de lai mayu yang, ndai wa kaw n-gup aga hte rai rai, ja gumhpraw shing nrai hpaga lama ma ni hte rai rai, ahkang hpyi ai hpang e sha lai lu ai, nga nna dumsa jaiwa ni tsun ma ai.
Ngahpang Yang Mare
Ndai mare hpe Ngadan Yang ngu nna mung shamying ma ai. Ngahpang Yang Madai wa e up sin ai mare re. Madai nga dun sa ai ni hpe sadi grai jaw ai wa re. Madai nga n tat hkrup na matu, Madai nga ra rawng ai lam n nga na matu sadi jaw ai re. Madai nga hta amyu myu byin jang, shing nrai Madai Ninghke kaw n lai lu ai nga lama rai jang, ndai mare kaw e pra nga ma ai. Ndai mare kaw bai du bra ai nga ai ni yawng hpe Kadaw Yang madai wa e madu ai rai.
Hpawgam Mare
Ndai mare hpe Hpawgam Madai wa e up ai. Hpawgam bu ni sha nga ai mare re ai. Mare masha ni gaw Madumnam Hka hpe lu ma ai. Manau dum ai ni hta na nkau mi gaw ndai Madai wa kaw du hkra sha mai jaw jau ai. Lahta de madun sai Madai Kaba wa gaw ndai mare du hkra up hkrang wu ai.
Zimat Yang Mare
Ndai mare hpe Zimat Yang Madai wa e up sin ai. Zimat Yang bu ni shanu nga ma ai. Zimat hpun grai sawng ai re majaw, manau poi galaw ai du magam ni gaw dumsa jaiwa jaigawng ni hpe zimat dan na nhtu langai, lagaw kabye nhtu langai jaw ra ai htung nga ai. Ndai nhtu lahkawng n jaw ai manau poi madu wa gaw Madai Shawu (Madai ana) lu chye ai, nga nna dumsa jaiwa ni tsun ma ai.
Busang Mare
Ndai mare hpe Sut Busang ngu ai wa e up sin ai. Busang nat ngu nna jaw jau hkam ai wa re. Mare masha ni gaw Namtsit Hka hpe lu ma ai. Busang wa gaw shinggyim sha ni machyi makaw tsin yam tsin dam hkrum jang, u wa yam nga amyu my hte shi hpe jaw yang shamai shatsai ya lu ai.
Sali Yang Bangsau
Likhpan mung de lung ai ni. Madai wa kaw lung ai ni, Mahtum Mahta ga lai nna, Busang mare garai n du ai aten hta hki ba la ai majaw, shing nrai jan du ai majaw, jahkring mi hkring sa la ai shara re ai. Sali si grai tu ai shara re ai.
Mahtum Mahta Mare
Ndai mare gaw Likhpan mung de mungkan ga a lapran hpat wat e nga ai. Dai majaw ndai mare hpe Kaang Yang Shadai, Kaang Yang Chyudai, Jahku Numshe Zup Mare ngu nna shamying ma ai. Mahtum Mahta ngu ai Lamu Salap wa e up sin ai mare re. Kaga mare ni hta grau kaba ai mare re ai. Mare masha ni gaw Htanhpang Hka hpe lu ma ai. Ndai mare kaw lam numshe-9 zup ma ai. Dai lam ni gaw Madai mare, Kadaw Yang mare, Ngahpang Yang mare, Hpawgam mare, Zimat Yang mare, Busang mare, Mushe mare, Lakdu mare hte Nbung mare de na hprang ai lam ni rai ma ai.
Mushe Mare
Ndai mare hpe Mushe Htin Nawng hte Mawru Jan Hka Mai e de nna up sin ai. Mare masha ni gaw Sana
Lakdu Mare
Ndai mare hpe Lakdu Htin shing nrai Gindawt Nawng ngu ai Shanu Htin hte Ginnen Majan yan de da nna up sin wu ai. Gindawt Htin Nawng ngu nna jaw jau wu ai. Lakdu mare masha ni gaw Sumnung Hka hpe lu ma ai. Lakdu Htin gaw lahta de na Madai nat du magam ni hte shinggyim masha ni a lapran na hkinmang salang kaba re ai.
Nbung Mare
Ndai mare hpe Mahku Sumnung hte Mala Nambung ngu ai yan de da wu ai. Ndai yan gaw nbung hpe up hkang let nbung hta e shingga amyu myu shapoi nna shana shabra ai yan rai ma ai. Lusi Lu-kang Hka hpe lu let sin ai yan mung rai ma ai. Ngarai nbung hte sumnung nbung yan hpe up ai wa mung re.
Shi Gindawn ngu ai Kadawn Munghkang a lam
Lapran Shingra mung hte mungkan ga Dinghta Wa Yang a lapran e nga ai tsang re ai. Ndai tsang gaw langai hte langai nbung ai tsang shi nga ai shara re ai. Mu Salap nga hpe gyit dun ai shaloi ndai tsang du jang mana maga shaja chye ma ia. Nga hpe lama tat hkrup jang nat n hkawt ai majaw, machyi makaw tsin yam tsin dam byin chye ai hta n-ga, si hkring si htan pyi byin chye ai. Nat hkawt yang gaw dinghku masha ni ngwi pyaw na. Machyi masha pyi mai tsai wa lu ai, ngu nna dumsa jaiwa ni tsun ma ai.
Masang Lahkum Buga
(Ndai buga shing nrai Mung a lam hpe alak mi bai mara na re)