Rev. Dr. Gam Seng
Hebre 4:12-13
Amerika mung e galaw ai Wunpawng sha ni a hkungran poi hta kaga ni hte laklai ai lam langai mi galaw nga ai. Lachyawp galai hkat ai ladat hpe galaw ai hpang, num ningnan gaw la ningnan hpe Jinghpaw nhpye hte n-ga jahpye ya nga ai. Dai n-ga hta rawng ai nhtu hte madu wa gaw madu jan hpe makawp maga bau maka ai wa re ai lam lachyum shapraw nga ai. Nhtu dai gaw ndung masen ai shing n rai pa ai rai na re. Rai tim nshan lahkawng maga dai ai baw n re. Nshan lahkawng maga dai ai rai gaw n ri hte hpyen sanat ndung e shakap ai baw nhkyi ni rai nga ai. Sinna ga na shada kahtam hkat ai hkyen ngu ai ginsup hpa hta lang ai nhtu ni gaw nshan lahkawng maga dai nna masen ai nhtu re. Dai ni anhte a Chyum ga hta tsun ai ntawng nhtu ngu ai gaw dai zawn re ai nhtu hpe ngu ai re. Majan rai re ai majaw ntawng nhtu dai gaw nhtu ni yawng hta grau dai ai nhtu re ai lam hpe chye lu ai. Nshan lahkawng maga dai ai re ai majaw hpyen wa a hkrum hkrang kata na masin salum hte nra hkrihkraw laswi lasa du hkra kalun dinghkren kau lu ai nhtu re.Karai Kasang a Mungga gaw dai zawn re ai ntawng nhtu hta grau dai ai ngu nna shadawn dan nga ai.
Karai Kasang a Mungga gaw ntawng nhtu hta grau dai ai hpe anhte gara hku chye lu ga ta? Ndai lam hpe anhte lam masum hku nna yu yu ga.
1. Karai Kasang a mungga gaw asak ahkrung nga ai hte galaoi mung shamu shamawt taw nga ai. Ntawng nhtu gaw gade dai ai nga tim masha e sha n lang yang shamu shamawt chye ai n rai. Asak mung n rawng ai sha kanang tawn yang kanang ataw nga ai. Karai Kasang a Mungga hta Karai Kasang a Wenyi n-gun atsam rawng nga ai rai nna Karai Kasang myit ra ai hte maren shamu shamawt bungli galaw nga ai. Shi a mungga hte nga yawng nga pra hpe shi hpan hpajang da nu ai. Shi a Mungga hte shi mungkan ga hpe yu lajang up hkang nga ai. Shi shangun dat ai Mungga gaw shi kaw Kaman bai nhtang wa ai n rai nga nna Myihtoi ga hta rawng nga ai. Shi a Mungga gaw hkrung nga ai sha n rai, masha hpe asak jahkrung ya lu nga ai. Shi a Mungga hpe hkap la ai ni gaw ji nat a gyit hkang da nns hktit gari let asak hkrung nga ai prat kaw na lawt wa lu ma ai. Shi a Mungga hpe hkap la ai ni gaw si du e gyit hkang da hkrum nna shani shana hkrit kahpra let myit mada shara n nga ai asak hkrung nga ai kaw nna htani htana asak a majaw nden marai hte myit mada shara hte hpring ai asak aprat hpe hkap la lu ma ai.
2. Karai Kasang a Mungga gaw anhte a myit masin kraw lawang kata na maw mawn yaw shada ai lam yawng hpe dinghkren lu nga ai. Karai Kasang hpe n chye shangun mayu nna makoi magap da ai n hkru n kaja ai amu yawng gaw shi a man e dan leng nga ai. Nhkru n kaja ai amu hta len pyaw mat ai myit kraw lawang hpe kalum dinghkren nna tara jeyang lu nga ai. Dawi hkawhkam gaw Karai Kasang a man e n hkru n kaja ai masha num shaw ai amu hpe galaw ai. Dai amu dan dawng wa na tai wa ai shaloi shi a mara hpe magap na matu shi shut ai num a madu wa hpe majan shingra kaw nna shaga la nna madu jan hte yup shangun ai. Dai zawn maw mawn ai lam n awng dang ai shaloi, dai hpyen ma wa hpe hpyen ni a lata hte sat kau ai. Yubak gaw magap magang magap ai wa hpe grau grau sung ai nhkun de dun bang mat wa nga ai. Masha num shaw ai amu kaw nna lahkam hte lahkam masha sat ai amu de dun bang wa sai re. Gade wa shim sai zawn nawn ai hku magap tim, Karai Kasang a man kaw na n makoi da lu ai. Karai Kasang gaw Myihtoi Nahtan a n-gup hte Dawi a ip da ai n hkru n kaja ai mara hpe sa shadan shadawng dan let daru sharin sai re.
3. Karai Kasang a Mungga gaw anhte yaw shada tawn ai shawng lam hpe azat kau ya nna shawng lam ningnan hpan shapraw ya lu nga ai. Ngai naw kaji ai shaloi jawng e sara sarama ni “Nang kaba jang hpa tai na kun?“ ngu san yang jawng sara tai nna shata shabrai htuk sha na ngu tsun tsun re ai. Rai tim kalang mi na nhtoi hta ngai Marku laika 8:36 hpe mu hti ai. Dai kaw Madu Yesu san da ai ga san ning nga ai: “Bai masha gaw ndai mungkan ting hpe madu lu da nna tinang a asak sum mat yang hpa akyu nga a ta?“ Ga san dai gaw nye a myit masin salum yawng hpe dinghkren nna ngai hpe shawng lam a matu myit kahpra mat shangun ai. Nhtoi na na yup n pyaw sha n mu rai taw nga ai ten hta Karai Kasang gaw ngai hpe shi a magma gun hpai ai wa tai na matu shaga ai lam hpe ngai chye na wa nna, nye a shawng lam hpe Karai Kasang a lata hta ap kau sai. Dai zawn ap kau ai hpang myit sim myit sa ail u la nna dai ni du hkra Madu a magma bungli hpe gunhpai let asak hkrung nga nngai rai.
Dai re ai majaw tsaw ra ai hpunau nauna ni e, anhte Karai Kasang a Mungga hpe hkaja nga ga yang, dai Mungga hpe majoi amu shangut hti shalai ai hku n galaw ai sha, nshan lahkawng maga dai ai ntawng nhtu hta grau dai ai Mungga re ai hpe chye na let, dai Mungga hte anhte a myit mang yaw shada ai lam shagu hpe shen dinglik yu nga ga. Dai Mungga gaw ahkrung nga ai hte alet nga ai hpe dum nga ga. Dai Mungga a daru sharing ai hpe madat mara ga. Dai Mungga e lam madun matsun ai hpe hkap la hkan sa na jin nga ga. Dai Mungga a dai la ai n-gun atsam hta shamyet shanat nna asak hkrung hkawm sa nga ga law.