Hkungga let tsaw ra ai Nung Lungmi amyu sha ji nban yawng hte hpe ndai labau hte seng nna lawu de na hte maren numhtet numra hpyi lajin dat ga ai.
1. Ginru ginsa yamban ban ai lam n hkum n tsup na re ai majaw, tinang lakung a ginru ginsa lam ni hpe laika hte ka shagun na matu mung, tinang nan sa nna n-gup ga hte tsun hkai na matu mung htet mayu ga ai.
2. Htinggaw mying hte seng nna n shalawm lu ai ni nga na re ai majaw, hpang na lang hta shalawm lu na matu ka jaw tsun jaw marit ngu hpyi nem ga ai.
3. Labau shang ninggun ja htawngmu ni share ja ninghkring ni a lam, up hkang ai lam hta dan dawng wa sai ningbaw ningla du magam ni a lam, myihtoi kaba ni, dumsa jaiwa kaba ni a lam, laklai ai masha ni a lam ni hpe mung shagun jaw na matu hpyi lajin ga ai.
4. Labau shang maumwi kadun ni, ga shagawp ni, matsun maroi ga ni ka jahting na matu shagun jaw na hpe grai myit mada ga ai.
5. Tinang a nga shara buga ni hta tu ai hpun kawa amyu myu a lam, namsi namsaw amyu myu a lam, bum shagawng mying ni, hka shi hka gai ni a mying ni, hkyet ni a mying ni, ri amyu myu a lam, u amyu myu a lam, lungpu ni, lunghkrung lungwap ni, nhprang rai ni, lak lai ai lunghtawn ni a lam hpe mung jahkum la na matu htet ga ai.
6. Labau shang masat dingsat hkang ni (Ga shadawn - Dusat hkang, masha lagaw hkang, nlung hkang ) hpe atsawm sha makawp maga na matu mung, sumla gayat nna shagun jaw na matu mung numhtet dat ga ai.
7. Amyu sha ni a lata amu amyu myu, ri da maka amyu myu hpe mung lak lai ai maka ni hpe mung mazing mat, wa na matut numhtet ga ai.
8. Nga shara buga ni hkan na manu dan ai arung arai ni hte dusat ni hpe n hten n mat na matu makawp maga mat wa na matu mung htet mayu ga ai.
9. Ahkyak ai labau Shang masha ni a datbung sumla kayat nna lawan dik ai hku shagun jaw na matu mung hpyi lajin dat ga ai.
10. Ahtik labau hta bang ra ai ngu sawn la ai hpa lam hpe raiti mung shagun jaw la na matu hpyi mayu ga ai.
Ndai lang dip dat ai ndai labau gaw lam hpaw ai hku nna shapraw ai shawng nnan na nhprang sha re ai. N hkum n tsup na mung teng sha re ai majaw, hpang na lang hta grau hkum tsup hkik hkam ai labau shapraw la lu na matu shatawng shada ai hte maren, amyu sha ni yawng myit rawt garum shingtau na matu aja awa hpyi lajin htet dat ga ai law.
Shagun jaw na hkring dat ni-
(1) Salang Ajawn Shin - 1/94, Ga Htu, Putao.
(2) Salang Htitgam Hpung - N. E 25, Myo Thit, Myitkyina.
(3) Salang Kawnglu Hpung San- GD 54, Shatapru, Myitkyina.
Labau Komiti
Nung Lungmi Htunghking Hpung