Masat (II) ngu na mungkan ga ntsa e nga lai wa sai, n hkru n kaja ai Lahtawng Lazan Dingli Dinglan masha ni hpe majoi sha-u hte gindap jahten kau ai hpang, Hpan Wa Karai e hpan da ai Ja E hte Nang E yan a matu mara rai nga ai, shinggyim sha tai na ni gaw Lapran Shingra mung na Masang Lahkum ngu ai mung kaw e nga nga ai kaw na mungkan ga de shayu dat na matu Hpan Wa Karai a ahkaw ahkang hte maren Masang Lahkum kaw nna masat 3 ngu na mungkan ga de ginru ginsa rawn nna pru yu wa ma ai.
Dai Masang Lahkum kaw nna rawt pru wa ai ni gaw shawng nnan e Lapran Shingra mung na Mahtum Mahta ga kaw nga nna law htam mayat maya wa ma ai. Dai Mahtum Mahta ga kaw chyu nga n mai ai majaw mung, mi shawng kaw nna yaw shada tawn ai lam a majaw mung, shinggyim sha ni gaw Mahtum Mahta ga kaw nna mungkan ga de matut rawt mat wa ma ai.
Dai majaw Mahtum Mahta e shaman jaw ai Sut rai gan rai sharung kungdawn amyu myu gun la nna rawt yu wa na matu jin nga chyalu rai wa ai shaloi, Lungmi kaji kawoi ni gaw, Mahtum Mahta hpe, anhte mungkan ga du wa jang anhte a mying hpe kaning ngu na rai da? ngu san wu ai. Mahtum Mahta salang kaba gaw Mahtum wan pai hpe Lungmi kaji kawoi yan kaw ap nna, Dinghta Wayang kaw du ai shaloi ndai wan pai hte wan wut mu; amyu a shingteng amying hpe LUNGMI ngu shamying mu, ngu nna shamying masat ya wu ai. Dai hpang Dinghta Majoi kaw Lungmi amyu sha ni a kaji kawoi Sut Kumju ngu ai Sut Matu hte Mahtum Mahta a shayi sha Mahtum Nang Pa