Mahte Laike 7:7-11
Chyum daw ndai kaw Madu Yesu kyu hpyi na lam hte seng nna sharin ya nga ai. Kyu hpyi ai masha shagu a matu myit mada shara kaba jaw ai Chyum daw re. “Hpyi mu, shaloi nanhte lu na myit dai; tam mu shaloi nanhte mu na myit dai; akawk mu shaloi nanhte hpe hpaw ya na ra ai.”
Karai Kasang gaw mungkan ga na kawa ni law law hta grau nna myit kaja ai hte, shi a shayi shadang sha ni a ra ai lam ni hpe chye ya nga ai sumsing lamu na kawa re ai majaw kyu hpyi ai ni kadai rai timung Karai Kasang kaw na mahtai lu la na ga sadi hpe jaw da ai re.
Kalang lang anhte gaw ndai Chyum daw hpe hti nna anhte hpyi mahpyi yawng Karai Kasang jaw na re ngu ai hku chye na ga ai. Dai majaw anhte hpyi ai n lu jang myit daw myit hten ai hte Karai Kasang hpe pawt mayu ga ai. Dai majaw dai ni kadun ai hku anhte a ga baw hta rawng ai ga san “Kyu hpyi shagu mahtai lu ga ni?” ngu ai hpe jawm myit sumru yu ga.
Anhte hpyi ai akyu ara hpe lu la ai ten hta anhte kabu gara let Karai Kasang madat ya ai ngu tsun ga ai. Anhte hpyi ai akyu ara hpe n lu la ai aten na na lai wa jang Karai Kasang anhte hpe n madat ya ai ngu myit la chye ga ai. Ya, masha a madang hta myit yu ga. Anhte a ma ni kanu kawa ni hpe shanhte ra ai lama ma hpyi yang hpyi shagu jaw a ni? Kaja ai arai hte shanhte ra kadawn nga ai hpe kanu kawa ni dang lu ai daram shakut shaja let tam ya nga ai. Ga shadawn: “Jawng shabrai bang ra ai” nga nna gumhpraw hpyi yang kanu kawa ni jaw lu hkra shakut nna jaw ai. Rai tim tsan ai ga de pyaw daw kadaw hkawm na matu hpyi ai shaloi lawan wan gumhpraw tam jaw ai kanu kawa law law n nga na re. Nkau mi gaw n jaw na ga htan lawan wan htan na re. Ndai hpe myit dum nna anhte Karai Kasang kaw na hpyi ai akyu ara hpe myit yu mai ga ai.
Karai Kasang gaw anhte hpyi ai akyu ara hte seng nna mahtai myu masum jaw lu ai hpe mu lu ga ai.
1. Anhte hpyi ai hte maren jaw ya ai mahtai: Anhte a kyu hpyi ai mahkrum madup law law hta Karai Kasang gaw anhte hpyi ai hpe jaw ya ai lam anhte mu lu ga ai. Hkrit hpa rutsang hpyen lama ma hte hkrum yang asak shalawt ya na matu anhte hpyi ga ai. Dai hte maren Karai Kasang lam hpaw ya ai shing n rai hpaji hparat jaw ai hte anhte hpe dai hkrit hpa kaw na shalawt la ai anhte hkrum ga ai. Nye a asak hta law law lang ngai dai zawn re ai aten hpe shalai yu sai. Hpyen shada gap hkat ai a lapran e matep taw nga ai ten hta Karai Kasang hpe shalawt la na matu akyu hpyi nna Karai Kasang karum la ai majaw dai ni du hkra asak naw hkrung taw nga ai. Machyi kaba hkrum nna kan ga lajang ra ai aten mung nga lai wa sai. Dai ten hta mung asak shalawt ya na matu ngai hkrai sha n rai, nta masha yawng mung hpung masha ni mung kyu hpyi karum ai majaw mai tsai wa nna ya mali shi ning jan nna sak hkrung nga lu nngai. Ndai zawn re ai mahkrum madup hpe dum yang Karai Kasang anhte hpyi ai akyu ara hpe jaw ya ai lam sakse hkam lu ga ai. Anhte langai hte langai a asak hta mung dai zawn re ai mahkrum madup nga sana re. Dai ni gaw anhte hpe Karai Kasang anhte a kyu hpyi ai ga madat let shaman chyeju jaw ya ai lam madun nga ai.
2. Anhte hpyi ai akyu ara hpe n jaw ai ngu ai mahtai: Mahtai ndai hpe mung Karai Kasang jaw nga ai. Chyum Laika hta mung ndai zawn re ai mahkrum madup hpe ka da nga ai. Dawi Hkawhkam gaw Uria a madu jan Betsheba kaw na shi a kasha alat rai nga ai ma machyi nna si wa hkyen ai shaloi, shi a myit shagrit shamen nna Karai Kasang kaw aja awa hpyi nem ai. Rai ti mung Myi Htoi Nahtan shi hpe Karai Kasang a ga htawn da ai hte maren, ma dai si mat ai. Karai Kasang a mahtai gaw n jaw lu ai ngu ai rai nga ai. Dai hte maren Madu Yesu gaw Getsemane sun e Karai Kasang hpe shi hkap la ra ai n ni n kri kaw na shalawt na matu hpyi ai. Rai tim Karai Kasang a mahtai gaw n jaw lu ai ngu ai hte maren Yesu gaw wudang ntsa e jen sat ai hpe hkam la nu ai. Ndai lam ni hpe yu yu yang, anhte a kyu hpyi ra sharawng ai lam gaw Karai Kasang a myit ra ai lam hte n htan shai taw nga yang, anhte hpyi ai lam hpe anhte n lu la na re ai hpe sharin la lu ga ai. Anhte a ma ni dwi hpa hpyi shagu anhte jaw yang ma ni a wa, wutung sha nna hten na re ai hpe chye ai majaw law law lang anhte shanhte hpyi ai hpe n jaw ga ai. Dai hte maren anhte hpyi ai lam ni gaw anhte a matu akyu hten na baw rai yang gaw Karai a mahtai mung “n jaw lu ai” ngu ai re. Kalang lang anhte hpyi ai hpe n lu yang anhte myit daw ai. Rai tim hpang e anhte bai nhtang yu ai shaloi hpa majaw Karai Kasang anhte hpe n jaw ai hpe chye na ai hte chyeju dum ai ten mung nga nga ai.
3. Anhte hpyi ai akyu ara hpe Karai Kasang gaw naw la u ngu ai mahtai: Matut nna myit galu galang hte hpyi nga u ngu ai gaw masum ngu na mahtai rai nga ai. Kalang lang anhte hpyi ai kyu hpi ga kaja ai hte ra kadawn ai teng ai. Rai tim Karai Kasang jaw na aten garai n du ai. Ngai Singapore na Chyum Jawng kaba langai mi kaw sara tai nga ai ten hta, nye a jawng ma langai mi a kawa gaw Madu Yesu hpe garai n kam sham ai. Kawa dingla gaw gat e nga katsing dut ai wa re. Ngai gat sa nna nga mari shagu shi kaw na mari ri re ai. Nye a jawng ma gaw shi a kawa a matu shi nan Hkristan tai ai ten kaw nna kyu hpyi ya nga ai. Lai wa sai masum mali ning hta dai jawng ma hpe ngai bai hkrum yang shi gaw mani sum re ai myiman hte Karai Kasang nye a kyu hpyi ga hpe madat ya ai hte nye wa gaw lai wa sai shata hta hkalup hkam la nna hpung masha tai wa sai ngu nna tsun dan nga ai. Anhte a matu mung shaning na na kyu hpyi nga ra ai lam ni nga na re. Ga shadawn anhte a Myen mung dan a matu ngwi pyaw sim sa ai mungdan tai wa na matu anhte myit n daw ai sha matut nna kyu hpyi sa wa ra nga ga ai.
Tsaw ra ai hpunau nauna ni, Karai Kasang anhte a kyu hpyi ga hpe mahtai jaw nga ai. Kaning re ai mahtai mahtang rai kun anhte myit yu ginhka la lu yang anhte a matu akyu rawng na re. Anhte a kyu hpyi ga hte maren anhte n lu la yang anhte hpa hpyi nga ai hpe bai kayin sumru la lu ai. Dai kyu hpyi ga kaw nna anhte sharin la na lam lu la ga ai. Anhte hpyi ai akyu ara gaw kaja ai kyu hpyi ga re ai hpe anhte myit hkut ga ti mung mahtai lawan n lu ai rai yang, anhte myit yaw mat shara n nga ai. Myit galu galang hte matut nna dai hpyi ga hpe hpyi nga mai ga ai. Karai Kasang a aten du yang anhte hpyi ai akyu ara a akyu hpe anhte hkap la lu na ga ai. Anhte hpyi ai hte maren lu la ai akyu ara law law a matu Karai Kasang hpe tut chyeju dum nga ga law.