Rev. Dr. Gam Seng
Yona Laika 4:1-11
Dai ni anhte na la lu ai Chyum ga gaw Ga Shaka Dingsa Laika hta rawng ai Myihtoi Yona Laika a jahtum na daw rai nga ai. Karai Kasang gaw Yona hpe Assyria mung na mare daju Neniwe mare de sasana dat wu ai. Yona chyawm gaw Israela masha ni a hpyen rai nga ai Neniwe masha ni hpe n ju n dawng nga ai rai nna Karai Kasang a ga hpe lale ai hte Karai Kasang a man nna hprawng mat wa na matu sinna maga e nga ai Tarshi mung ngu ai Spain maga de sa ai sanghpaw li hta shang makoi rawng nga ai. Sanghpaw li dai Nawng Kaba a kaang de du mat wa ai shaloi laru kaba hte katut nna li hta lawm sa ai bungli galaw ai ni yawng kajawng kaja kaba hkrum ai hte gade a mjaw shanhte yubak ari hkrum nga ai hpe tam sagawn ma ai. Shanhte li ting hkan tam ai shaloi li a npu htap e n dum shamyi yup taw nga ai Yona hpe sa mu ma ai.
Li masha ni hpa rai shi hpe hkan tam ai lam hpe chye ai hte rau Yona gaw shi a majaw li masha ni yawng ruyak tsin yam hkrum nga ai hpe dum nna, shanhte tam nga ai gaw shi nan re ai lam yin la wu ai. Shanghpaw ma ni gaw shi hpe naw hkye la mayu ai majaw shi a Karai Kasang kaw kyu hpyi na matu shi hpe hpyi nem ma ai. Rai tim Yona gaw shi hpe panglai de kabai bang kau na matu shadut mu ai rai nna, hpang jahktum e shanhte shi hpe panglai de kabai bang kau ma ai. Shing rai nbung laru sim mat ai hte li dai gaw apyaw sha hka lam matut hkawm mat wa lu sai.
Yona hpe chyawm gaw Karai Kasang garai n si shangun ai. Panglai nga kaba langai hpe Karai Kasang san da wu ai hte maren dai nga gaw Yona hpe mayu kau wu ai. Yona ngai kaba a kan e rawng taw nga yang dai tsin yam kaw nna lawt na matu Karai Kasang kaw kyu hpyi wu ai. Karai Kasang shi a hpyi ga hpe madat ya nna dai nga kaba gaw Yona hpe panglai hkin gau kaw sa madawn shapraw dat wu ai.
Dai zawn hkye la hkrum ai hpang Yona hpe Karai Kasang kalang mi bai shangun ai shaloi Yona gaw amu shangut hku nna galaw na myit daw dan let Neniwe mare de sa wa nu ai. Grai kaba la ai majaw masum ya hkawm yang she hkren lu ai mare kaba de lani mi hkawm shang wa nna, “Mali ya a hpang e Karai Kasang Neniwe mare kaba hpe jahten shaza kau na ra ai” ngu nna jahtau tsun sa wa ai. Yona a ga na ai shaloi Neniwe hkawhkam hte hpawn mare masha yawng hte gaw myit malai lu ai hte lusha gam nna tinang a hkum hpe shagrit shanem ai kumla madun let dap sumpum hta dung nna Karai Kasang a man e yawn hkyen nga ma ai. Karai Kasang dai hpe mu jang Neniwe masha ni hpe shaza kau na ari hpe dawm la kau wu ai.
Yona chyawm gaw shi ndawng n yawt nga ai Neniwe masha ni hpe Karai Kasang shaza kau na hpe myit mi adik sha yu la lu na matu mare a sinpraw maga e nga ai kawng langai mi a ntsa e sum kasha langai gap nna sa la yu dung taw nga ai. Karai Kasang gaw Yona a baw hta jan shingkang agre nga ai hpe jasim ya na matu dai sum ntsa e alap kaba lap ai tau dwi ru hpe shaprut ya wu ai. Chyahkring mi Yona gaw “zing hte” poi yu taw nga ai. Dai hpang Karai Kasang gaw shingtai langai mi hpe shangun dat nna tau dwi ru dai hpe sa kawa shanyip kau ya wu ai rai nna, Yona gaw jan ja ai hte nbung kahtet ahpawt ai hkam sha nu ai rai nna, myit n ji n mu ai hte masin nachying pawt nga wu ai.
Karai Kasang Yona kaw sa nna, “Nang masin pawt mai a ni?” ngu sa san ai shaloi Yona gaw “ngai si hkra masin pawt mai ai. Hkrung nga ai hta si mat ai gaw grau kaja ai” ngu nna hkap htan wu ai. Shaloi Karai Kasang shi hpe sharin ga hte san ai gaw, “Nang nan e hkai shatut ai mung n rai, lani sha hta tu nna lana sha hta nyip mat chye ai tau dwi ru hpe nang lahpawt ai majaw dai daram pawt ai rai yang, jaw ai hte n jaw ai hpe garai n chye ginhka ai masha sen mi mun lahkawng hte dusat law law nga ai Neniwe mare kaba hpe ngai n lahpawt na rai ni?” ngu wu ai.
Maumwi ndai hta Karai Kasang shi a masha ni hpe sharin shaga ai lam kaba lahkawng hpe mu lu ga ai.
1. Yona ngu ai a lachyum gaw u ra ngu ai re. U tawng gaw Myen mung masha ni a kumla re ai hte maren U ra gaw Israela masha ni a kumla rai nga ai. Yona gaw Israela masha ni a malai hku nna Assyria masha ni hpang de sasana dat hkrum ai wa re. Rai tim Assyria masha ni gaw shanhte n ju n dawng nga ai hpyen ni rai ma ai mjaw Yona Karai Kasang a shangun ai hpe n kam galaw nga ai. Shi hpe sinpraw de shangun dat yang sinna de hprawng nga ai. Hprawng n lawt ai kaw du yang amu shangut galaw na matu kanung ai myit hte sasana rawt ai. Rai tim shi a hpyen ni hkye la hkrum na matu n rai, shanhte yawng Karai Kasang a jahten shaza ai ari hkrum na matu yaw shada let sasana sa nu ai. Hpang jahtum du hkra shi gaw Karai Kasang hpe pawt dingyang rai taw nga ai.
2. Karai Kasang gaw shi hpan da ai masha yawng hpe tsaw ra ai. Shanhte langai mi mung hten bya hkrum na hpe n ra ai. Shi a tsaw ra myit hpe shawng chye na ai, shi e shawng nnan shi a amyu masha shatai la sai ni hpe shi jai lang nna kaga masha ni hpe hkye hkrang la ai lam jaw ya mayu ai. Shi shawng shaga la sai amyu masha ni gaw n dawng n yawt ai nsin hta asak hkrung nga ma ai majaw, Karai Kasang a tsaw ra myit hpe shanhte n dawng n yawt ai masha ni hte n karan ya lu ma ai. Yona a maumwi hta Karai Kasang gaw n dawng n yawt ai myit a nsin hta hkawm sa taw nga ai shi a amyu masha ni a ntsa e myit naw galu kaba ai hte shanhte myit hprang wa hkra ja la ai myit kraw lawang hpe dinghkren lu ai ga san hte naw san ala nga ai. Karai Kasang a tsaw ra myit gade dam lada nga ai hte galu kaba nga ai hpe kalang lata maumwi ndai hta madun nga ai. Karai Kasang a tsaw ra myit ndai hpe Madu Yesu adan sha sharin ya sai. Shi tsun ai “Na a hpyen wa hpe tsaw ra nga u. Nang hpe zingri ai wa a matu kyu hpyi ya u” nga ai.
Dai ni Karai Kasang a tsaw ra myit hpe hkam la lu sai anhte gaw Karai Kasang anhte hpe hpyen ai ni hpang de shangun dat nga ai kun? Anhte Karai Kasang hpe gara hku htan nga ga ai kun? Myihtoi Yona hta rawng ai myit anhte hta gade kaba nga ai kun? Karai Kasang Yona hpe hpang jahtum san ai ga san hpe anhte gara hku htai nga ga ai kun? N htai ai zim sha nga yang gaw n dang kau ai hte bung ai. Yona zawn kanung ai myit hte htai ga yang mung Karai Kasang anhte hpe myit galu kaba hte naw la nga ai. Mai sa, ngu htai yang gaw, anhte a kraw lawang hta naw dang taw nga ai n dawng n yawt ai myit hpe Karai Kasang a tsaw ra myit hte shawng tsi shamai la wa ga. Dai hpang Madu Karai Kasazng shangun ai magam hpe shi jaw ya ai n-gun hte galaw sa wa ga. Anhte a Myen mung buga hpung law law gaw Myen sasana hta shang lawm shakut shaja nga ma ai. Anhte hta na mung Myen sasana de, Miwa sasana de shang lawm ai masha pru wa hkra kyu hpyi myit mada nga ga.
Karai Kasang a tsaw ra myit gaw galu kaba dam lada nga ai. Shi myit yaw shada ai lam byin tai hkra shi hkan galaw nga ai. Neniwe masha ni htenza ai n hkrum hkra je hpre ai myit rawng ai shi a amyu masha Yona hpe jai lang nna shi a shatawng shada ai lam shabyin shatai nga ai. Anhte langai hte langai hpe mung Karai Kasang jai lang lu nga ai. Je hpre ai hku shagwi ai lam amyu myu hkam nna Karai Kasang a shangun ai ga madat na kun? Shing n rai kabu gara ai myit hte chyeju dum let Shi a jai lang ai hpe hkam la na kun? Karai Kasang gaw tsaw ra chyeju dum ai myit hte shi shangun ai magam hpe galaw na sharawng awng nga ai. Dai gaw shangun hkrum ai ni a matu mung myit pyaw myit dik ai aska hkrung lam rai nga ai. Tsaw ra ai hpunau nauna ni sung sung myit sumru yu nna Karai Kasang a Wenyi lam madun ai hpe madat mara galaw sa wa ga.