Hpan Ningsang Chyeng Ningchyang Ninggawn Tawa Karai Kasang gaw sumsing lamu hte ginding aga hep hpan da ngut ai hte sumsing lamu hpe mawn sumli shatsawm shahtap na matu likhpan mung hpe hkawlen ngu ai mare kaba 9 hte Asak Hka Nu hpe de da wu ai.
Dai hkawlen ni gaw, (1) Lungseng Hkawlen, (2) Ja Hkawlen, (3) Gumhpraw Hkawlen, (4) Magri Hkawlen, (5) Hpri Hkawlen, (6) Maju Hkawlen, (7) Mawen (hpri hpraw) Hkawlen, (8) Jamma Pat Hkawlen, (9) Ga Wut Hkawlen hte (10) Asak Hkanu ni rai ma ai.
Ndai Hkawlen 10 hte mawn sumli tawn ai Likhpan mung gaw jan shata shagan ni n nga ai, ningsin mung n nga ai. Nsam amyu myu kabrim kabram re ai mungdan re ai. Hpan Wa Karai gaw kabrim la ai dung ting-nyang ntsa e dung ning ngai nga nna, shi a hpung shingkang mung htoi kabrim la nga ai. Dai majuaw dai mung hpe nga mai mung, hpaw mai mung, sang lai mung, sut su ai mung, shat shadu sha n ra ai mung, bungli n galaw ra ai mung, hki si hkiba ai n nga ai mung, ruyak jam jau ai n nga ai mung, si hkrung si htan n nga ai mung, gumgai ai dingla ai ngu n nga ai mung, pyaw chyu pyaw ai mung, ra n rawng ai mung ngu nna shamying ma ai. Dai mung hpe Hpan Wa Karai e Ja E yan Nang E hpe up sin shangun wu ai. Dinghta ga na si mat ai dinghpring chyoi pra ai ni gaw Likhpan mung de du wa mahka e Likhpan mung chyinghka hpe Ja E yan Nang E e hpaw ya nna ngwi pyaw ai mahku nsen hte hkap tau la ma ai. Likhpan mung chyinghka kaw e joi jang lang ai wa hpe mung sin shangun wu ai. N gin n dan ai sha Likhpan mung de shang mayu ai ni hpe shen nna ngarai di de jahkrat na matu re ai. Likhpan mung kaw Hpan Ningsan Chye Ningchyang Ninggawn Tawa Karai Kasang nga ai shara hpe Pungding Hkawlen, Ningdung Hkawlen, Karai Hkawlen ngu nna mung, Hpan Ningsang Hkawlen, Chye Ningcyang Hkawlen, Ninggawn Tawa Hkawlen ngu nna mung shamying ma ai. Hpan Wa Ningsang Chye Wa Ningchyang Ninggawn Tawa Karai gaw hpung shingkang tingnyang hta dung let, hpung shingkang singkaw hte pyen let nga ai.. Lapran Shingra mung, dinghta mung-kan du hkra pyen hkawm du ai. Ndai Hkaw Len Mung masha ni gaw Hpan Ningsan Chyeng Ningchyang Karai ni hpe shani shana shakawn kungdawn ma ai.
Ningsin Dulawng a lam
Likhpan mung a lawu de gaw lalam 9 galu ai wan shanan 9 shachyi htum ai daram kaba ai niongsin dumlawng ngu ai shara nga ai. Dai dumlawng a kaang kaw Likhpan mung de hkrang ai lam nga ai. Dai lam a pai maga e ngarai di (shing nrai) ngarai wan nawng de hkrang ai lam nga ai. Kamhpoi brang nawng ni gaw ningsin dumlawng de du jang lam n dam mat na matu shada da lata hkindun manat let lam n yit n shut hkra Likhpan mung de lung lung rai ma ai. Ningsin Dumlawng gaw nachying sin mak ai shara rai nna lam dam na grai loi ai lawan ai shara re ai.
Jan Shata Shagan mung a lam
Ningsin Dumlawng a lawu, Lapran Shingra mung a lahta e jan shata shagan mung nga ai. Jan shata shagan naura ngu nna mung tsun ma ai. Dai mungdan a lahta Likhpan mung maga de gaw htoi leng sha-ngun nna lawu maga lapran Shingra mung hte ginding aga de gaw nhtoi kaba nhtoi kaji nhtoi mashi mani mahkra htoi na matu Hpan Wa Karai e lajang da wu ai. Jan shata shagan mung masha ni gaw aten hte aten e manau poi galaw chye ma ai. Ndai jan, shata, shagan sha ni mung, Hpan Ningsan Chyeng Ningchyang Karai ni hpe shani shana aten tup shakawn kungdawn let nga nga ma ai.