Rev. Dr. Gam Seng
Mahte Laika 6:1-13
Jinghpaw ga “akyu hpyi” ngu ai gaw Myen ga su taung ngu ai အhe lachyum bung ai. Shaman chyeju hpyi la ai gaw lachyum madung re ai zawn mu lu ai. Rai tim Chyum Laika hta na kyu hpyi ai ngu ai lachyum madung gaw Karai Kasang hte matut mahkai kanawn mazum ai hpe ngu ai she rai nga ai. Karai Kasang kaw na hpyi ai sha n rai, shi hpe shagrau shaa ai, shakawn kungdawn ai, chyeju dum ai hte anhte a lam tsun shana dan ai lam ni lawm nga ai. Myen mung ga de nga ai anhte a kanu kawa jinghku jingyu ni hte telephone hku shaga hkat ai shaloi tsun ai lam ni hte mai shadawn ai. Madung gaw mahku mara shangang shagrin ai baw ga anhte tsun shaga nga ai. Dai hte maren Karai Kasang kaw kyu hpyi ai ngu ai gaw shi hte mahku mara ai lam hta shangang shakang ai amu langai mi rai nga ai.
Dai ni anhte na la sai Chyum Ga hta, Madu Yesu shi a sape ni hpe kaning re ai myit hte Karai Kasang kaw kyu hpyi na lam sharin ya nga ai. Shawng nnan e kaning re ai myit hte kyu n mai hpyi ai lam hpe sharin ya ai. Dai hpang she kaning re ai myit he Karai Kasang kaw sit shang kyu hpyi na lam hpe madun dan nga ai. Dai yan hpe ndai ten e anhte langai hpang langai jawm madat sharin la ga.
I. Kaning re ai myit hte n mai hpyi ai lam:
A. Masha kaga ni a shakawn shagrau ai hkam la na myit mada let kyu hpyi dan ai hku n mai galaw ai. Hkristan masha ni a kyu hpyi ai gaw tinang a matu arawng mala, arawng tam ai amu hte nachying n htan shai nga ai. Hpa majaw nga yang teng man ai hku akyu hpyi ai wa gaw Karai Kasang a man e tinang a mara yin la let, myit shagrit shanem nna akyu ara hpyi nga ai. Kyu hpyi ai lailen hpe lang nna tinang a arawng kaba jat na hku galaw ai gaw Karai Kasang a man e n tsawm n htap ai lam rai nga ai. Madu Yesu tsun ai dai zawn galaw ai wa gaw, shi myit mada ai hte maren kaga masha ni shi hpe shakawn jang pyaw mat sai. Karai Kasang kaw na shi hpyi ai lam gaw lu tim n lu tim ahkyak n rai mat sai. Dai zawn Karai Kasang kaw na hpa n myit mada sai re ai majaw, hpa mung lu la sana n rai. Yesu a prat hta na nawku htung hkan shadik ai ni nkau mi lani mi hta masum lang lang kyu hpyi ai ten hpe masha ni hpe kyu hpyi dan ai hku jai lang ma ai. Dai zawn arawng mala na matu kyu hpyi ai gaw Karai Kasang ra sharawng ai hkungga n re ai lam Madu Yesu sharin ya nga ai. Dai ni anhte hpung masha ni a lapran e mung dai zawn byin chye ai. Nawku htung lai langai ngai hpe chye galaw chye hkan sa ai majaw gumrawng gumtawng ai myit rawng wa ga yang gaw Madu Yesu a sadi jaw ai lam hpe myit dum let anhte a myit hpe sharai la ga.
B. Karai Kasang a machye machyang hpaji hpe n chye na ai sha na hpang nna maji la ai hpara langai hpe zawn kahtap gala, atik anang re ai myit hte hpyi ai gaw n jaw ai lam re. Karai Kasang a shayi shadang sha ni gaw, hpara shaje ni hpe nawku ai ni zawn kahtap gala galu galang re ai hku n hpyi na matu sharin da ai. Galu galang hpyi ai majaw Karai Kasang madat ya na re ngu myit ai lam gaw chye na shut ai myit mang ai lam re ai hpe Madu Yesu asan sha sharin da nga ai. Karai Kasang gaw yawng mayawng hpe chye ai wa re ai hte maren, anhte langai hte langai a ra ai lam ni hpe chye ya nga ai. Anhte hta mung kalang lang chye na shut ai hku nna kyu hpyi chye ga ai. Kalang lang “Madu e, Madu e, Madu e, Madu e,” nga nna hpyi ai ga hpe na ga ga ai. Ndai zawn anhte galaw ai gaw, Madu hpe myit kaja ai, anhte a ra kadawn ai lam hpe chye ai wa, anhte hpe n hpaw n ya jaw ai wa re ai lam hpe n chye na ga ai majaw galaw ai lachyum pru nga ai. Madu Karai Kasang gaw anhte a lam n chye ai wa n rai; maji la ai the jaw hkra shagwi ra ai wa mung n rai. Dai majaw anhte chye na shut, myit shut ai lam ni a majaw shut ai hku kyu hpyi nga ga yang ya sharai la sa wa ga.
II. Kaning re ai myit hte hpyi na lam:
A. Karai Kasang gaw kata ntsa shara magup hpe mu lu ai wa re ngu ai machye machyang myit hte kyu hpyi ra ai. Tsun mayu ai gaw anhte a kyu hpyi ai lailen gaw arawng mala ai ntai u ga, shawa zup ai gat shingra hkan n re ai sha machyi shim ai shara, masha garu gachyi rai n yu taw nga ai nta kata gawk e, Karai Kasang hte shaga kanawn mazum na matu Yesu sharin ya ai re. Ndai gaw shawa nawku hpawng e kyu hpyi yang n kaja ai ngu mayu ai n rai. Nawku hpawng hte nawku nta ni gaw kyu hpyi na matu san da ai shara rai nna galoi mung Karai Kasang a man e myit shagrit shamen let kyu hpyi mai ai shara rai nga ai. Myit tsaw myit dap rai gumrawng gumtawng ai hku kyu hpyi na chyawm gaw Nawku Htingnu e hpyi tim Karai Kasang n htan ya ai lam Madu Yesu sharin ya da nga ai (Luke 18:9-14). Karai Kasang gaw yawng mayawng hpe mu ya chye ya ai wa re ngu ai makam masham hte tengman ai hku kyu hpyi mai ai gaw anhte a matu grai kaba la ai ahkaw ahkang langai mi rai nga ai. Anhte kaning re ai hkrit hpa shara hkan nga hkawm ai ten hta rai tim, kaning re ai shara hta makoi da ai hkrum tim, tinang hkrai sha yawn hkyen hkrum nga ai ten hta rai tim, machyi makaw hkrum nga ai ten hta rai tim n dut n dang Karai Kasang hte matut mahkai lu nga ai. Anhte a yubak mara hta kaga Karai Kasang hte anhte hpe jahka lu ai madin hkumba hpa mung n nga ai lam dan leng nga ai. Kaning re ai shara kaw nna anhte kyu hpyi ai rai tim Karai Kasang mu ya chye ya nga ai majaw mawdaw gawt nga tim, jak rung e bungli galaw nga ti mung, Karai Kasang hte matut mahkai nga na n malap ga. Ngai Singapore mare hta mawdaw gawt hkawm ra ai ten shagu, “Madu e ngai hpe tut maja nga let gawt hkawm lu na atsam jaw rit” ngu nna kyu hpyi hkawm ai hpe dum lu ai.
B. Karai Kasang gaw anhte hpe tsaw ra matsan dum ai wa rai nna anhte a ra ai lam shagu hpe tau chye ai wa re ngu ai makam masham hte kyu hpyi ra ga ai. Anhte a ra ai lam shagu hpe chye ai Kawa kaw na akyu ara hpyi nga ai hpe chye yang gaw anhte a kyu hpyi ga hpe nhti nhtang kahtap gala rai n hpyi ra ai. Ra ai hpe adingtawk sha kalang mi hpyi yang Karai Kasang na ya ai lam hpe Madu Yesu sharin ya nga ai. Ndai gaw kaga nawku htung hta na kyu hpyi ai lam hte shai ai lam langai mi re. Nawku htung nkau mi hta kyu hpyi ga hkum masum mali hpe aten galu galang kahtap tsun tsun re ai hpe mu lu ai. Kalang lang kyu hpyi ai ga hpe matsing loi na matu ga shagawp hku shagawp da nga ai. Kalang lang ga shagawp ka ai lai hta nan ga si n rai tim lachyum hpe kahtap nna tsun ai kyu hpyi ga nga ai. Dai zawn re ai hku kahtap ai hpe Yesu tsun mayu ai n rai. Masha law law e a yan n lang ai, malawng maga lachyum n chye na ai ga si ni hpe kahtap gala rai tsun ai hpe ngu ai re. Dai zawn re ai kyu hpyi ga law malawng gaw maigan ga si ni rai chye nga ai. Lachyum n chye na ai ga si ni re ai majaw na na lang wa jang ga si dai ni nan dagu atsam rawng ai ga ni re ngu ai hku nna jai lang wa nga ai. Dai zawn byin ai rai yang kyu hpyi ga gaw Karai Kasang kaw du na malai hpyi ai ni hpe lam shadam ai maga de woi du wa nga ai. Dai rai nna anhte gaw adingtawk sha kadun ai hku Karai Kasang hte matut mahkai lu sai majaw anhte a dinghku hta ma ni hpe “ga yan kyu hpyi ga” ngu ai hte kyu hpyi sharin ya mai ga ai.
Ga shadawn: Karai Wa e, chyeju kaba sai. Karai Wa e, ngai hte rau nga rit. Karai Wa e, karum la rit. Karai Wa e. ngai yup wa sana. Karai Wa e, hkye la rit law. Karai Wa e, shamai ya rit. Karai Wa e, dai ni tup ngai hpe lam woi rit ngu ai kyu hpyi ga ni re.
Madu Yesu sharin ya ai kyu hpyi ga hpe jawm tsun ai hku nna mungga ndai hpe hpungdim dat ga:
Sumsing Lamu na anhte a Wa e,
Na a mying ningsang chyoi pra nga lit ga.
Na a mungdan du wa ru ga.
Lamu tang hta na a myit dik nga ai hte maren,
Ga ningtsa e mung dik wa lit ga law.
Anhte hta ra ai lusha,
Dai ni anhte hpe jaw mi.
Masha ni anhte hpe shut ai mara,
Anhte raw kau ya ai zawn,
Anhte a mara hpe mung raw kau ya mi.
Agung alau nga ai de anhte hpe n sa shangun ai sha,
N kaja ai lam hta na shaw la mi law.
N-gawn tawa hpe hkang ai ahkang hte,
Hpung shingkang arawng sadang gaw,
Htani htana nang hta anga nga u ga law. Amen
By Rev. Dr. Gam Seng