Shk. 10:1-2, 6-7, 12, 16-18,
Roma 8:23-25, 35-39
Chyum ga matsun, Shk. 10 hta,
Tara n lang ai ni, n-gun ja ai ni, gumrawng gum tawng ai ni gaw hkalem hkalau, kashun kashe rai let matsan ai ni, kaji kadun ai ni, KK a kashu kasha ni hpe roi rip, ka-up sha, zingri zingrat rai nga ai lam hpe Shk. sara wa gaw, KK hpang de tang dan wu ai.
Dai re majaw Anhte mung anhte a yakhkak tsin-yam lam KK hpang de tang dan saga ai. Hkying hkum 24/48 akyu hpyi ai lam lang hte lang Ramma ni woi awn let galaw sai. KK gaw anhte hpyi ai hpe madat nna bungli galaw wa na re. Anhte matut nna hpyi ra ga ai. Rama 8 hta, (1) shinggayim masha hte nga manga gaw ruyak tsin-yam hkrum let madai nga ai lam kasa Pawlu tsun ai. (2) Shut hpyit yubak mara a majaw tsinyam hkrum nga ai lam hte, Yesu Hkristu hta pru lawt lu na lam; Yesu X’tu hpe kam sham nga na lam; tinang a ra rawng ai lam tawngban sit shang na lam, (3) anhte kade n-gun ja ai raitim, KK a tsaw ra ai hta na anhte hpe n jahka lu na lam kasa Pawlu shaleng dan sai.
Anhte a asak hkrung lam; Ndai mungkan e asak hkrung ai aten hta tsin yam tsin dam, n tara ai hku dip up dip sha, n hkrum nra, kawsi hpang gara, machyi makaw yawn hkyen lam ni hkrum hkra nga ga ai. Satan wa n-gun dat nga ai. Anhte KK a kashu kasha ni Hkristu hta awng dang ra ai. X’tan hpyen hking dagraw ra ai. (Ehpesu 6). Mai kaja teng man lam a matu atsam dat ra ai. Awng padang bandung
Nang myit ru myit tsang, myit kaji nga nni? Lama ma hpe hkrit tsang nga nni? Myit mada shara n nga ai wa zawn byin nga nni? Mahte 6:27 hta, Nanhte myit tsang ai hte tinang a sak hpe dawng mi daram sit lu na myit ni? Nga nna Yesu tsun ai. Anhte a shawng lam hpe anhte n chye ndai; tim KK chye ai. Shi gaw anhte a shawng lam hpe up ai wa re. Shi anhte hpe tsawra ai hte kam hpa mai ai Madu re. Shi nang hpe karum lu nga ai. Na a myit kraw hta shi hpe hkap la u. Shi na a matu lajang ya sai lam ni hpe sawn yu let chyeju dum u. Shi hpe kam u. Na a shut shai ai lam hpe hpyi nem bawngban let Shi hte kahkyin gumdin nga u.
Nden Marai; Hkristan ni gaw nden marai hte sak hkrung ra ga ai. Tengman ai ga hpe tsun, tengman ai lam hpe tatut galaw sa wa ra ai. Tsaw ra myit hte tengman ai ga hpe tsun nga yang, X’tu hta galu kaba wa na re (Ehp. 4:15). Tengman ai lam hpe chye nna hkan sa yang lawt lu na re (Yh. 8:32).
N jaw ai hpe n jaw ai n mai ai ngu tsun na yak ai. Tinang hta grau arawng aya lu ai wa, kaba ai wa hpe tsun sharai na nloi nga ai. Hkristan ni gaw, ndai nloi ai lam a ntsa e hkawm sa ra ai. Tsaw ra myit hte gwi gwi tsun shaga ra ai. Dai majaw, dinghku kata, Hpung kata, rung kata, bungli dabang ni hta raitim, n jaw ai hpe n jaw ai, nmai ai hpe n mai ai ngu tsun u. Si mani ngang kang ai myiman madun u. KK nang hpe jai lang na re. Anhte Wunpawng Jinghpaw ni kaw sasana shang ai, 100 ning jan sai, makam masham myit jasat kung kaba ra sai.
Ndai ruyak tsin yam hpring nna n tara lam law ai mungkan hta, KK nang hpe lata sai.. KK a kasha hku asak hkrung shamu shamawt nga ra ai. Shaloi na a grup yin hta, n htoi tai wa lu nna galai shai shangun na re. Ndai gaw X’tu hta awng palang lu wa ai lam re. Ka-up na matu, madu kau na matu maw mawn ai lam hpe galai kau, dang kau ai lam re. Makam masham n greng, n htoi n lu tai yang lup mat, sum mat na tsang ra dik nga ai. Dai majaw, Makam masham hte n hkru n hkra hpe dang kau ga. Awng palang madu Yesu X’tu nang hte rau re.
Awng dang lam majing hpe KK a n-gun atsam hte sha mai lu la ai. N-gun hte, gumhpraw hte, hpaji hte lajang ai awng dang lam gaw n grin ai hpe mu na re. Dai majaw hpan Madu KK hpe kam sham let, shi a n-gun atsawm hta awng dang lam gaw gap la ga.
By Rev. Sabaw Sinwa Naw, KBC Nsen kaw na re..