1 Korinhtu 3:1-9
Rev. Dr. Gam Seng Shae
Dai ni anhte na la lu sai Chyum ga hta Kasa Pawlu gaw Korinhtu mare na hpung masha ni hpe daru sharin nga ai ga na lu ga ai. Korinhtu hpung masha ni gaw Madu Yesu hpe hkap la kam sham ai tsawm ra ning rai wa sai rai ti mung shanhte a myit mang hkawm sa ai lam ni hta Madu Yesu a tsaw ra myit he shi a sharin shaga ai lam ni hpe chye na ai maka n shapraw dan lu ma ai. Dai hta jan nna, shanhte gaw ma kaji ni zawn shada da manawn masham ai akyang hpe madun nga ma ai. Bai nna ma kaji ni ginsup rai kashun hkat let ga li ga law ai lam galaw ai zawn Korinhtu hpung masha ni hta ga li ga law ai lam nga nga ai. Ndai zawn re ai akyang lai len hte hkawm sa ai hpung masha ni gaw wenyi makam masham hte hkawm sa asak hkrung ai lam hta ma chyangai naw rai nga ma ai lam hpe Kasa Pawlu tsun shaleng dan nga ai.
Dai ni anhte ni mung, shaning hku hti ga nga yang Hkristan tai ai ram ram na ai hkrai rai saga ai. Anhte a sak hkrung kanawn mazum ai lam ni hpe kayin mada yu ai shaloi hpung masha shada da a lapran e mung, dinghku masha shada da a lapran e mung manang wa awng dang na hpe manawn masham ai myit, manang a akyu jahten mayu ai myit, arawng mala shingjawng hkat nna n ju n dawng, kashun kashe, ga li ga law ai lam ni hpe naw mu lu nga ga ai. Dai zawn re ai lam ni anhte hta naw nga dingsa gaw anhte mung makam masham wenyi lam hta ma chyangai zawn rai nga ai ni re ai lam dinglik la lu nga ga ai. Ndai shaning ningnan hta shang wa nga ai ten hta du na ra ai shaning tup hta anhte a makam masham wenyi sak hkrung ai lam hta hkalung ai ban kaw nna kunghpan n-gun jat wa ai madang de gara hku shamu shamawt rawt jat sa wa na matu yaw shada hkyen lajang sa wa yu ga.
Makam masham galu kaba wa na lam hkyen lajang ai hta shawng ningnan anhte chye ra ai gaw ya yang e anhte gara madang kaw nga nga ga ta? Dai madang kaw nna rawt jat wa hkra shai wa galai wa ai lam hpa baw nga ra a ta ngu ai ga san hpe htai ra nga ga ai. Anhte a madang gara kaw rai nga ai lam Kasa Pawlu Korinhtu masha ni hpe daru sharin ai ga kaw nna anhte nan mung Korinhtu masha ni zawn makam masham lam law law hta naw hkalung ai ni re ai lam chye lu saga ai. Dai ban kaw nna makam masham hta ginsa ngang grin ai hpung masha ni tai wa lu hkra anhte hta byin tai ra ai lam lahkawng hpe Kasa Pawlu matut nna sharin ya nga ai.
Langai ngu na hpe Kasa Pawlu ga shadawn hku tsun da ai gaw, hpung masha ni gaw Karai Kasang a yi hkauna re, ngu ai rai nga ai. Anhte Karai Kasang a yi hkauna rai nga ga yang gaw shi anhte hta gat hkai ai nli ni hpe hkap la ai ni anhte rai nga ga ai. Dai anhte hkap la tawn ai nli ni hpe tu pru wa nna asi si ai nli tum ni byin tai u ga Karai Kasang gaw yi hkauna na ga hpe hkyen lajang ai zawn anhte a myit masin kraw lawang hpe lajang ya nna anhte hta hkai da ai shi a mungga hpe asi si wa shangun nga ai. Yi hkauna gaw ja ai nsi naisai shapraw lu u ga namhpun rawng ra nga ai. Yi sun hkauna hta ga sau kaja na matu yi hkauna galaw ai wa gaw namhpun hpe law hkra shakut tam bang nga ai. Dai hte maren Karai Kasang mung masha a myit kraw lawang hta shi a mungga tu kaba wa hkra Chyoi pra ai wenyi a shamu shamawt ai bungli amyu myu hte myit masin kraw lawang hpe hpaw ya nga ai.
Dai re ai majaw, tsaw ra ai hpung masha hpunau nauna ni e, numbat langai ngu na anhte htawt na lahkawm gaw, anhte a hkum hkrang myit kraw lawang hpe Karai Kasang hpe ap ya ai lahkam re. Karai Kasang anhte a myit kraw lawang hpe jai lang nna shi a mungga hpe gat hkai u ga. Karai Kasang shi a wenyi hte anhte a myit masin hpe lajang ya nna shi a mungga tu kaba wa let asi kaja law law si shapraw shangun u ga. Karai Kasang hpe anhte a myit masin hkum hkrang ap nawng ai kyu anhte hpyi ga. Dai kyu hpyi ai hte maren Karai Kasang anhte hpe jai lang na hpe mung jin jin rai nga ga. Karai Kasang a mungga gaw anhte a myit masin hta dingtawk du ai mung nga ai. Law malawng gaw anhte hpe jaw da chyalu rai sai Chyum Mungga hku nna anhte kaw du nga ai. Dai Chyum Mungga a lachyum hpe hkan nna ka jahtuk da ai mahkawn mangoi ni kaw na mung Karai Kasang a Mungga hpe anhte hkap la lu ga ai. Chyum laika hpe hti sharin la nna Madu Yesu hte kanawn mazum rau hkawm rau sa ai gaw makam masham hta rawt kaba wa ai lam a matu nachying ahkyak ai lam langai mi rai nga ai. Dai rai nna ndai lam hta myit lawm nna shakut mayu ai hpunau nauna ni a matu du na ra ai shata kaw nna tinang hkrai Chyum Laika hti ai lamang hpe hpung woi sara wa hku nna lajang shabra na re. Anhte a hpung N-gun Awai hpawng galaw ai ten hta Chyum Laika machye machyang hta gade daram jat wa sai hpe chye lu hkra n-gun sharawt shingjawng poi woi galaw lu hkra shakut sa wa na re. Yawng shang lawm na matu ahkaw hkang nga ai hte maren yawng hpe saw shaga nngai.
Lahkam lahkawng ngu na hpe mung Kasa Pawlu gaw ga shadawn lang nna sharin da nga ai. Anhte hpung masha ni gaw Karai Kasang a nta re ngu nna tsun ai. Kasa Pawlu gaw hpung masha langai mi a hkum hkrang hpe mung hpung masha law law hpawng de ai wuhpung wuhpawng hpe mung Karai Kasang shanu nga ai nta shing n rai htingnu hte shadawn dawn re ai hpe mu lu ga ai. Ndai yang e Karai Kasang a nta ngu ai gaw Karai Kasang shanu nga ai shara ngu ai rai nga ai. Ga shadawn ndai gaw anhte a hpung hte mung seng nga ai. Rai sa, anhte a hpung gaw Karai Kasang shanu nga ai nta re. Dai rai yang kaning san ai nta wa rai nga ga ta? Kawa hte galaw nna shangu hte galup ai nta rai ni? Hpun pyen hte galaw nna hpri hpraw hte galup ai nta rai ni?
Wut hte shing n rai pilat hte galaw nna wut pa hte galup ai nta rai kun? Shinggan maga nna mu lu ai nta hkrang hpe hpa hte galaw da ai gaw dai daram ahkyak ai n re. Kaning re ai nta mi rai nga ga tim Karai Kasang anhte hte kam shanu nga ai hpe mahtang chyeju dum let kabu gara shara rai nga mali
Lahkam masum ngu na gaw, hpung hpe woi awn nga ai hpung woi sara, hpung komiti ningbaw ningla ni hte hpungtau ni a matu Kasa Pawlu lam madun da ai naw nga ai. Kasa Pawlu shi hkum nan hte shi a manang wa Apolo hpe Karai Kasang a shingdep singtau ni ngu yin la ai re. Hpung hpe lam woi ai ni anhte langai hte langai mung tinang a hkum hpe Karai Kasang a shingdep shingtau re ai lam yin la lu ga ai. Shingdep shingtau ni ngu ai gaw shada da arawng kashun let shingjawng hkat nga na lam n nga ai. Kasa Pawlu shi hkum nan hpe nli gat hkai ai wa hku mu la nna shi a manang wa Apolo hpe hkai da sai nli a ntsa e hka jaw ai wa hku tsun nga ai. Amu n bung hkat ai. Rai ti mung, lahkawng yan gaw galaw ra ai bungli re. Langai mi hpe galaw ai wa gaw kaga hpe galaw ai wa hta grau grit ai shing n rai grau reng ai ngu jahpoi ai shing n rai arawng mala shara n nga ai. Shan lahkawng yan hte gingdan ai shabrai hpe gaw Karai Kasang jaw na sha re. Kasa Pawlu nan tsun ai gaw,“ hkai ai wa hte hka jaw ai wa gaw maren shingdep singtau rai ma ai.“ Tu pru wa nna asi si shangun ai gaw Karai Kasang rai nga ai. Hpung amu gunhpai ai anhte ni mung tinang galaw nga ai magam bungli hpe ndai zawn chye na mai ga ai. Hpung woi wa galaw ai bungli hte Hpungtau wa galaw ai bungli, hpung komiti ni galaw ai bungli hte hpung masha amu shatsam hkrum ai ni galaw ai bungli, langai hte langai shai hkat nga ai. Rai ti mung dai bungli ni yawng gaw Karai Kasang hpe shingdep shingtau ai bungli ni hkrai re. Karai Kasang gaw anhte yawng jawm galaw ai magam bungli hpe awng dang shangun nga ai. Ndai lam hpe anhte langai hte langai chye na hkap la ga yang gaw hpung a woi awn ai lam hta n ru n ra ga li ga law rai na lam n nga ai. Shada myit hkrum mang rum let makam masham hta rawt jat galu kaba wa hkra hkawm sa wa lu na ga ai.
Dai re ai majaw tsaw ra ai hpunau nauna ni yawng hte e dai ni anhte sharin la lu sai lahkam masum hpe hpung masha da hpung woi ningshawng ni da myit masin kraw lawang hta hkam la nna 2010 ning hta kabye shang wa ga. Wenyi makam mashan hta hkalung ai ma chyangai a ban hpe lai kau da nna, shat ja sha lu nna wa ngan tai ai ngu ai makam masham hta n-gun lapying rawng nna Karai Kasang a mungdan hpe gaw gap lu ai ni tai ai madang de Karai Kasang jaw ya ai n-gun atsam hte rawt sa wa ga law.